საქართველოს ჟურნალისტური ეთიკის ქარტია

მონიტორინგის შედეგები – ახალი ამბები 17 მაისს

საქართველოს ჟურნალისტური ეთიკის ქარტია

ტელეკომპანიების – საზოგადოებრივი მაუწყებელი, “რუსთავი2” “იმედი” ,,მაესტრო/მაესტრო 24“, ,,მეცხრე არხი“, ,,კავკასია“, ,,აჭარა“ – 17 მაისის საინფორმაციო გამოშვებების მონიტორინგის შედეგები

17 მაისს რუსთაველის გამზირზე მიმდინარე მოვლენები სატელევიზიო არხებმა ადეკვატურად გააშუქეს. მაყურებელს ტელეკომპანიათა ეთერში მეტნაკლებად შეეძლო ენახა აქციისა და მომხდარი დაპირისპირების ამსახველი კადრები, მოესმინა კომენტარები და შეფასებები. ახალი მასალისა და ინფორმაციის ეთერში გადაცემა ხდებოდა ოპერატიულად. ტელეკომპანიების მხრიდან აშკარად შეინიშნებოდა მცდელობა მაქსიმალურად შეეკვეცათ სიძულვილის ენის შემცველი კომენტარები, რათა ისინი არ მოხვედრილიყო ეთერში, ტელეკომპანია “მეცხრე არხის” ერთ-ერთმა წამყვანმა ეთერში ბოდიშიც მოუხადა მაყურებელს, თუ მათი მცდელობის მიუხედავად ამგვარი ტექსტი ეთერში მაინც მოხვდებოდა. მცდელობის მიუხედავად, ჰომოფობიის გასაპროტესტებლად დაგეგმილი აქციის მონაწილეთა მისამართით მათი მოწინააღმდეგეების მხრიდან ყველა ტელეკომპანიის ეთერში მაინც ისმოდა სალანძღავი სიტყვები.

მთავარი პრობლემა, რომელიც 17 მაისის მოვლენების გაშუქებისას, ძირითადად დღის საინფორმაციო გამოშვებებში გამოიკვეთა, იყო ტერმინების არასწორი გამოყენება, რაც საბოლოო ჯამში მაყურებლის შეცდომაში შეყვანას გამოიწვევდა. მაგალითად: ტელეკომპანიების უმრავლესობა ჰომოფობია/ტრანსფობიის წინააღმდეგ დაგეგმილი აქციის ორგანიზატორებსა და მონაწილეებს მოიხსენიებდა: ლგბტ პირები, ლგბტ წარმომადგენლები, ლგბტ საზოგადოების წარმომადგენლები, სექსუალურ უმცირესობათა წარმომადგენლები. გამოშვებაში გასულ ტიტრებში კი აქციას ერქვა “ლგბტ აქცია”. ამ მხრივ გამონაკლისი აღმოჩნდა “კავკასია”. მას ექსტრემალურ საინფორმაციო ეთერი არ ჰქონია, ტელეკომპანიამ საინფორმაციო მაუწყებლობა 17.00-საათიდან დაიწყო და აქციას თავიდანვე მოიხსენიებდა, როგორც “იდენტობის” მიერ დაგეგმილ პროტესტს ან ჰომოფობიის წინააღმდეგ  მიმართულ აქციას.

ტელეკომპანიების უმრავლესობამ ეს უზუსტობა უკვე დღის მეორე ნახევარში გაასწორა, როდესაც პარლამენტთან დაგეგმილ აქციას სრულად მოიხსენიებდნენ როგორც ჰომოფობიის წინააღმდეგ მიმართულ აქციას, შეიცვალა ტიტრებიც. Read more of this post

ჟურნალისტური ეთიკის ქარტიას ტელეკომპანია „იმედის“ 6 წარმომადგენელი შეუერთდა

ჟურნალისტური ეთიკის ქარტიის განცხადება 17 მაისის მოვლენებთან დაკავშირებით

საქართველოს ჟურნალისტური ეთიკის ქარტია შეშფოთებულია დღეს დედაქალაქის ცენტრში მომხდარი მოვლენებით, რომლის დროსაც დაშავდა ათობით ადამიანი. ამ დროისთვის არსებული მონაცემებით ასევე დაშავებულები არიან რადიო “ფორტუნას” სააგენტო “ნიუპოსტისა” და სტუდენტური მულტიმედია ჯგუფის  ჟურნალისტები, რომლებიც რუსთაველის გამზირზე აქციის გასაშუქებლად იმყოფებოდნენ.

საქართველოს ჟურნალისტური ეთიკის ქარტია აცხადებს, რომ ჩვენთვის უპირატესია თითოეული მოქალაქის კონსტიტუციური უფლება დაიცვას საკუთარი უფლებები და გამოხატოს საკუთარი აზრი თავისუფლად, რომ რუსთაველზე დაგეგმილი ორივე აქციის ორგანიზატორებსა და მონაწილეებს ჰქონდათ სრული უფლება გამოეხატათ პროტესტი, თუმცა ჟურნალისტური ეთიკის ქარტია შეშფოთებულია  და გმობს იმ ძალადობასა და აგრესიას, რომლის მოწმეც დღეს საზოგადოება გახდა.

მედიით გავრცელებული მასალები აჩენს ეჭვს და ამაზე საუბრობს სახალხო დამცველიც და არასამთავრობო სექტორიც, რომელიც დღევანდელ მოვლენებს აკვირდებოდა, რომ აქციის მონაწილეთა ნაწილის მხრიდან ადგილი ჰქონდა ძალადობას და კანონის დარღვევას. ჟურნალისტური ეთიკის ქარტია იმედოვნებს, რომ სამართალდამცველი სტრუქტურები რეაგირებას მოახდენენ ამ ფაქტებზე.

ჟურნალისტური ეთიკის ქარტია მიიჩნევს, რომ მსგავს ვითარებაში განსაკუთრებული პასუხისმგებლობა ეკისრება საზოგადოების თითოეულ წევრს, სამღვდელოებას, ხელისუფლებას, არასამათავრობო სექტორს, მედიას. ქარტიის საბჭო მთელი დღის განმავლობაში აკვირდებოდა მედიის მუშაობას და ერთდღიანი მონიტორინგის შედეგებს მოგვიანებით შესთავაზებს საზოგადოებას, როდესაც მედიაში დღევანდელი მთავარი თემის განხილვა დასრულდება და შესაძლებლობა გვექნება დავინახოთ სრული სურათი.

საქართველოს ჟურნალისტური ეთიკის ქარტიის განცხადება

ხვალ, 17 მაისს რუსთაველის გამზირზე, პარლამენტის შენობასთან იმართება ჰომოფობია/ტრანსფობიასთან ბრძოლის დღის აღსანიშნავი საპროტესტო აქცია. პარალელურად, რუსთაველზე იკრიბებიან ის ადამიანებიც, ვინც ჰომოფობიის წინააღმდეგ დაგეგმილ აქციას უცხადებს პროტესტს.

 გასული წლის გამოცდილების გათვალისწინებით, შესაძლოა, 17 მაისის აქცია წარიმართოს  რთულ ვითარებაში. ორგანიზაცია “იდენტობამ” უკვე გამოაქვეყნა აქციაში მონაწილეობის მსურველთათვის უსაფრთხოების სავალდებულო წესები, რომლის მიხედვითაც გამზირზე მობილიზებული იქნება პოლიციაც და თავად აქციის მონაწილეებიც იმოქმედებენ ფრთხილად და მშვიდობიანად, ყოველგვარი კონფლიქტისა და დაძაბულობის გარეშე.

 დღეს რამდენიმე არასამათავრობო ორგანიზაციამ გაავრცელა განცხადება პარლამენტთან მიმდინარე აქციის ერთობლივი მონიტორინგის შესახებ. საქართველოს ჟურნალისტური ეთიკის ქარტია მიესალმება ამ სამოქალაქო ინიციატივას და იმედოვნებს, რომ ეს ხელს შეუწყობს აქციის მშვიდ გარემოში ჩატარებას.

 საქართველოს ჟურნალისტური ეთიკის ქარტია, თავის მხრივ, მთელი დღის განმავლობაში დააკვირდება მედიის მუშაობას და ერთდღიანი მონიტორინგის შედეგებს გააცნობს საზოგადოებას.

 ჟურნალისტური ეთიკის ქარტია მიიჩნევს, რომ ამგვარ ვითარებაში განსაკუთრებული როლი ენიჭება მედიას, რადგან ძალიან მნიშვნელოვანია საზოგადოებამ მიიღოს ზუსტი და გაწონასწორებული ინფორმაცია მიმდინარე მოვლენის შესახებ. ქარტია სთხოვს მედიის წარმომადგენლებს, მაღალი პროფესიული და ეთიკური სტანდარტების გათვალისწინებით მოეკიდონ აღნიშნული ამბის გაშუქებას და ამავე დროს აქციაზე მომუშავე ჟურნალისტებმა უსაფრთხოების დაცვის მიზნით თან იქონიონ მედიის წარმომადგენლის დამადასტურებელი საბუთი. 

ევროკავშირის პრიზი ჟურნალისტიკაში 2013

ევროკავშირის წარმომადგენლობა საქართველოში აცხადებს კონკურსის “ევროკავშირის პრიზი ჟურნალისტიკაში” მეორე რაუნდს.

კონკურსი მიზნად ისახავს ქართულ პრესაში, ტელევიზიაში, რადიოსა და სოციალურ მედიაში ისეთი ჟურნალისტური ნაშრომების აღიარებას, რომლებისც ხელს უწყობს ევროკავშირის ღირებულებების უკეთ გაგებას, შესრულებულია პროფესიონალურ დონეზე და ჟურნალისტური ეთიკის მაღალი სტანდარტების დაცვით.

       საპრიზო გატეგორიები:

 1. საუკეთესო საგამომძიებლო სტატია ან ნარკვევი ბეჭდვით ან ონლაინ მედიაში;

2. საუკეთესო ტელე/ რადიო სიუჟეტი ან საგამომძიებლო რეპორტაჟი;

3. საუკეთესო ვებ გვერდი/ბლოგი/სოციალური ქსელის პროფილი, რომელიც ხელს უწყობს ცოცხალ, დაბალანსებულ, სამართლიან და პლურალისტურ დებატებს.

4. ყველაზე ინფორმატიული საინფორმაციო სააგენტო ან ონალინ გაზეთი.

კონკურსი პირველად საქართველოში ჩატარდა 2012 წელს

დეტალური ინფორმაცია კონკურსის შესახებ იხილეთ: www.euprizejournalism.ge